Ørsta Reiselivslag og Volda Reiselivslag

Velkomen til Volda/Ørsta og sentrum av Sunnmøre - til fritid med opplevingar og utfordringar, eller kvile og ro - til friluftsferie mellom hav, fjord, dalar og fjell:

Laksefiske i landskjende elvar, aurefiske i hundretals vatn, og fjordfiske. Bading i fjorden, i elvar eller i iskalde fjellvatn. Brettsegling, hengegliding, skigåing langt utover sommaren, eller fotturar i Sunnmørsalpane. Båtliv på fjorden og i dei mange småbåthamnene. Hesteskyss.

Frisk luft og reint vatn - fjellferie og fjordferie i same distrikt.

Dei første feriegjestane kom til Volda/Ørsta for å gå i fjellet. Engelskmenn oppdaga den sunnmørske fjellheimen kring hundreårsskiftet, og dei kom igjen år etter år. Slingsby, Patchell og Randers er kjende namn for norske fjellinteresserte, og her kan du gå same turane som dei skriv i fjellvandingsbøkene sine. Her finst enkle ruter og godt oppmerka stiar i flate fjelldalar omkransa av kvasse fjell, her er fjelltoppar som alle kan nå, og her er utfordringar for klatreinteresserte.

Utleige av jaktrettar for små-/storviltjakt.

Hovudvegen på Vestlandet, E39, går gjennom tettstadane Volda og Ørsta. Her er flyplass med daglege samband til stamflyplassnettet. Frå Volda/Ørsta kan du også ta dagsturar til andre kjende reisemål som Geiranger, fugleøya Runde, Briksdalsbreen og Ålesund.

Møre og Romsdal Reiselivsråd

Ørsta - eit eldorado for fjellfolk og naturelskarar

Møre og Romsdal er berømt for sine fjell. Trollheimen, Sunndalen, Romsdalen og Tafjordfjella er nokre av dei mest kjende. Turløypene går på kryss og tvers og Turistforeininga sine hytter ligg på høveleg avstand. For deg som planlegg ein ferie der turar i fjellet inngår i programmet så har det opna seg nye mogelegheiter. Fleire bedrifter og interessegrupper arrangerer organiserte turar, fjellklatringar, opplevingsprogram og kurs i korleis ein kan meistre utfordringane ein møter i fjellet.

Sunnmørsalpane er mellom dei mest fantastiske fjellområda i Noreg. I hjartet av desse - i Ørsta, finn ein mellom anna Tindesenteret AS. Dei arrangerer fleirdagsturar med overnatting og pensjon. Dei har tindebestiging og opplæringsprogram for dei som ønskjer å lære om snø og skred. I Ørsta kan du også følgje med på hesteskyss opp i fjellheimen, fiske i ei av dei mange lakseelvane - eller kort og godt slappe av i ein vakker natur. Alt dette medan du bur godt i ei eiga hytte, på ein bondegard eller på ein av dei mange hytte- og campinganlegga.

I sentrum av Sunnmørsalpane

Ørsta og Volda - to særmerkte bygdebyar midt i ein fantastisk natur. Vi trur at eit av dei sterkaste inntrykka du vil sitje att med etter eit opphald er undring og overrasking over alt du kan ta del i. Dei mektige Sunnmørsalpane med eit utal merkte stiar for turar og fantastiske klatrefjell. Fiskevatna som glitrar i kvar ein dal og på alle flyar. Dei brusande elvane kor laks- og ørretfiskarens lukke blir sett på prøve. Turane med hest og vogn opp til seterstøylar og utfartsstad. Dei spanande dagane i Bjørkedalen kor vikingeskip byggast også idag og kor du kan ta del i seglasen på det vakre vatnet. Og midt oppe i alt dette, to 'byar' med eit rikt kulturliv, handlegater med mange små og store butikkar. Hotella er velkjende og særmerkte - og stilen spenner frå det heilt moderne til det romantiske og gammaldagse.

Hytteutleige, gardsturisme, campingplassar, spisestader av alle slag - alt dette og meir til sikrar deg og dine eit opphald som du vil minnast - og med glede.

Legg ferien til Ørsta

Om du tenkjer på å reise til Ørsta, er det kanskje sommaren som er mest aktuell. Er du heldig med vêret, vil eg påstå at Ørsta og området rundt er av dei beste stadane i landet du kan opphalde deg om du er interessert i friluftsliv - særskilt tenkjer eg då på tur i fjellet og tinderangling. Få andre stader finn du så variert terreng, og ikkje minst det spesielle forholdet fjell og fjord. Sats på perioden juli/august; i juni er det ofte ein del morgonskodde i fjella, noko som utset fjellturen og kan hindre deg i å få fullt utbytte av dagen.

Personleg er det vinteren som er favorittårstida heime i Ørsta - med nok snø i fjella og mykje godvêr i påskeferien, er det ikkje aktuelt å vurdere alternativa ein gong. Heldigvis er det ofte både bra snøforhold og godt vêr i påska på Sunnmøre, så det er definitivt staden å vere på den tida av året. Bondalseidet Ski- og Friluftssenter har ope kvar dag heile påska - det er faktisk heller ikkje uvanleg at Bondalseidet held ope til slutten av mai, og du kan av og til gå på skitur i fjella heilt til tidleg i juni. Om noko av dette høyrest interessant ut, skaff deg den nye "bibelen for fjellfolk" - Skiturar i Sunnmørsalpane frå Iriss Forlag.

Bondalseidet Ski- og Friluftssenter

Bondalseidet Ski- og Friluftssenter ønskjer deg velkomen til eit moderne skianlegg med løyper og utfordringar for alle. Her er krevjande alpine løyper og lett turterreng. Bondalseidet er eit av dei mest snøsikre anlegga i Noreg, med ein sesong som strekkjer seg frå desember og ut i mai/juni. Terrenget på Bondalseidet gir eit glimrande utgangspunkt for frikøyring i laussnø for både telemark- og alpinkøyring.

Det er lagt stor vekt på at folk i alle aldrar skal trivast på Bondalseidet, og områda rundt kioskane og varmestovene er populære samlingsstader for folk som vil treffe kvarandre. I påska er Nottane ein populær samlingsstad for alle skigåarar; alpin, telemark, tur. Trekket i Nottane vert nytta til sesongslutt ca 1. juni.

Bondalseidet Ski- og Friluftssenter har ei moderne stolheis, ny i 1992. Dette gjer det enkelt for alle å kome seg til fjells både sommar og vinter. Stolheisa er med på å forlenge sesongen på Bondalseidet.

Fjelltoppane kring heisanlegget på Bondalseidet har i mange år vore glimrande startpunkt for hangglidarar og paraglidarar. Stolheisa gjer det enkelt å frakte med seg utstyret til topps. Bondalseidet har vore arena for fleire Norgescup-tevlingar og meisterskap med internasjonal deltaking.

Vidare kan eg leggje til at Bondalseidet har eitt barnetrekk, to skitrekk og den nemnde stolheisa. Når du først har kome deg til toppen i det øvste trekket - Nottane (ca 800 moh.) - har du mange flotte løyper å velje mellom; vanskelege løyper, lette løyper, turløyper og sjølvsagt mykje laussnø! Du kan også bruke 30-45 minutt på turen opp til toppen av Verhaldet. Frå denne toppen kan du faktisk - om du er kjend i området eller har med kjentfolk - køyre på ski over ei mil heilt frå 1205 moh. ned til Hjørundfjorden og Sæbø.

Sjølvsagt er det ikkje berre Bondalseidet Ski- og Friluftssenter Ørsta har å by på i ein eventuell vinter- eller påskeferie; eit heilt utal av fjell ventar på deg i Sunnmørsalpane. Og du har endå fleire mogelegheiter til sommaren og hausten. Skiturar om vinteren og våren er som nemnd over godt skildra i Skiturar i Sunnmørsalpane. Nokre av turane Ørsta Reiselivslag tilrår følgjer under.

Saudehornet (1303 moh.)
Sauehornet er det høgaste fjellet nærast sentrum. Ein er ingen rett ørsting om ein ikkje har vore ein tur på Sauehornet. Turen kan gåast både opp Vikeskåla og Skytjadalen. Opp Skytjadalen er god rås (sti), så nær som opp frå botnen bak i dalen. På kanten bak Vallahornet er det tydeleg rås til topps, der det er god utsikt. Oppstiginga til sjølve hornet er noko luftig. Det er såleis ein bra prestasjon å ha vore på Sauehornet. Ein bør ha gode sko (fjellsko) på turen, som varer 6-7 timar. Dette er ein ganske krevjande tur.

Kolåstinden (1432 moh.)
Kolåstinden er kongen blant fjella i Ørsta, men er ikkje det høgaste. Høgare er Skårasalen med 1542, Slogen 1564, Jakta 1588, Smørskredtindane 1630, Kårdalstindane 1470 og Kvitegga 1691 moh. Sommarstida startar ein turen til Kolåstinden ved hytteområdet ved Standalssætra. Ein går oppover ein turr rygg, retning Kvanndalen. Så passerer ein Appelsinhaugen, går bratt opp til venstre og går gjennom eit skar, 'Strætet'. Etter dette er der ein isbre, og ein må ha med kjentmann. Turen tek 5-7 timar frå Kolåsen til Standalseidet. Det er ein krevjande tur. Dei mest krevjande punkta på turen er 'Strætet' og 'Sprekka'. 'Sprekka', som er der isbreen smeltar frå fjellet ligg kloss under tinden.

Molladalen
Molladalen ligg mellom Barstadvik og Ytre-Standal. Den er eit av dei mest populære turmåla på desse kantar. Molladalen er kjend for mange revne, ville og kvasse tindar på eit lite område. Men i distriktet er det fleire dalar som liknar Molladalen. Det er Kvistaddalen, Kvamsedalen, Lisje-Trandal-dalen, Nordkopen (Urke) og Norangsdalen (der er bilveg). Molladalen kjem som nummer ein fordi han er mest brukt, og fordi han ligg sentralt til. Han er tilkomeleg frå Barstadvik og Ytre-Standal, men og frå Romedalen forbi Hallahornet og over Fossane. Oppstiginga er noko bratt same kvar ein kjem frå, så 5-7 timar må ein rekne med. Terrenget må kallast noko krevjande.

Etter dette kan det vere lett å tru at du må ut og gå lange fotturar for å få utbytte av eit Ørsta-opphald. For deg som er meir oppteken av mindre fysisk prega opplevingar, har Ørsta også slikt å by på. Hugsar du sølvbryllaupsreisa til den norske kongefamilien? Ørsta kommune, og særskilt Hotel Union Øye, var då ein av dei stadane i Noreg kongeparet viste fram til dei prominente gjestane frå andre kongehus i Europa. Etter denne reisa vart delar av ruta dei brukte kalla "Dronningruta".

I Ørsta er vi også stolte over å ha oppfostra nynorskens far Ivar Aasen, og det er sjølvsagt mogeleg å sjå korleis han levde på Ivar Aasen museet. Dette og nokre andre småstader det kan vere interessant å besøke følgjer under - igjen henta frå brosjyrer og informasjon frå Ørsta Reiselivslag:

"Dronningruta" - Norangsdalen
Trongaste dalføret i Noreg, prega av kampen mot naturkreftene: Ved Jelskredvatnet er dalbotnen fylt av utrasa ur. På Urasætra og Stavbergsætra la dei husa inn i bakken som ly mot ras. Langsstøylvatnet: Vart til då eit ras stengde elva i 1908. Ein kan sjå hustuftene på botnen! Ved Skylstad kjem ein inn i ein naturkatedral, 'bygd' av tindar som Skruven, Slogen, Litlehorn, Smørskredtindane og Jakta. Hotel Union Øye er ein attraksjon i seg sjølv, gjenskapt slik det sto ferdig i 1893. 7 europeiske dronningar har teke turen gjennom Norangsdalen.

Hotel Union Øye

Året er 1891. Dei første pionérane har for lengst opdaga Noreg. Reiseskildringar er skrivne og turiststraumen aukar. Europas aristokrati og overklasse søkjer nye reisemål. Det er eit kresent klientell Hotel Union Øye åpnar dørene for på forsommaren dette året. Gjestebøkene for åra som kjem viser at man lykkast. Dronning Willemina av Nederland og Keiser Wilhelm II av Tyskland var mellom dei faste gjestane. Dronning Maud og Kong Haakon VII besøkte hotellet på kroningsferda frå Trondheim. Vi tør påstå at det var meir enn ein storslagen natur som var årsaka til at så mange notabilitetar fann seg til rette på Hotel Union Øye, - og det er ein arv i er oss bevisst. Hotellet vart også eit senter for fjellsport. Den kjende britiske fjellvandraren C. W. Patchell hadde i heile 40 sesongar Hotel Union Øye som utgangspunkt for sine vandringar i Sunnmørsalpane.

Hotel Union Øye idag. Hotellet har gjennomgått ei omfattande rehabilitering både inn- og utvendig, og framstår idag som i sine glansdagar. Det har vore vårt mål å gjenskape atmosfæra av ro og harmoni som herska i tidlegare tider, og som så mange andre stader er gått tapt. På ein pietetsfull måte er dette kombinert med moderne fasilitetar. Interiøret er halde i ein stil frå rundt århundreskiftet. Ingen av gjesteromma er like, utanom komfortable himmelsenger og moderne bad/WC. Telefon på romma er med medvit utelate. Alt dette gjer at ein tur til Hotel Union Øye vert meir enn ei reise til ein spennande stad - det vert også ei reise i tid.

Ivar Aasen Museet
Her var den kjende diktaren og språkgranskaren Ivar Aasen fødd (1813-1896). Museet inneheld mellom anna den verdfulle boksamlinga og møblane hans. Omvising avtalast på førehand. Dei Nynorske Festspela vert årleg arrangert i august/september.

Brudavolltunet
Kulturhistorisk friluftsmuseum. Gardstun med bygningar og hage frå tidleg på 1800-talet. Natursti Brudavollen: Startar ved skogvegskrysset ovanfor Brudavolltunet, til Kuhammaren. Herifrå fleire alternative ruter.

Dei Julianske Borgene på Grøthornet
To hellelagde borger, lagt i ring som ein labyrint. Truleg frå bronsealderen, ca 1500 f.Kr.